Буряад Уласта заншалта ёһоороо октябрь соо соносхогдодог габшагай һарын түгэсхэлэй найр ба «Буряад юртэмсэ» гэһэн тоглолто октябриин 25-да үнгэрбэ. Тэрэнэй үедэ элдэб хэмжээ ябуулгануудай, урилдаа мүрысөөнүүдэй дүнгүүд согсологдожо, илагшадта шагналнууд барюулагдаа. Буряад драмын театрта болоһон буряад хэлэнэй һайндэртэ Буряад Уласай Арадай Хуралай Түрүүлэгшэ Владимир Павлов хабаадажа, заншалта ёһоороо буряадаар амаршалга хүргөө.
Та бүгэдэниие Арадай Хуралай һунгамалнуудай зүгһөө энэ һайхан үдэрөөр, буряад хэлэнэй һайндэрөөр амаршалнаб. Жэл бүри эндэ суглараад, хайшан гэжэ саашадаа манай буряад хэлэ хүгжөөхэбибди, гамнахабибди, үнгэрһэн жэл соо ямар ажал ябуулаабибди, ямар зорилгонуудые шиидхээбибди, ямар дүнгүүдые туйлаабибди гэжэ хөөрэлдэдэгбди. Харахада, ехэ юумэн хэгдэһэн байна. Буряад Уласай Толгойлогшо Алексей Цыденов буряад хэлэ хүгжөөлгэдэ ехэ анхаралаа хандуулна. Буряад хэлэнэй комисси баталаа, өөрөө энэ комиссиин зүблөөнүүдые үнгэргэнэ. Мүн баһа Арадай Хуралай һунгамалнууд эдэбхитэйгээр энэ ажал ябуулна. Хэдэн хэрэгтэй хуулинуудые баталаа.
Энээнһээ гадна БГТРК, Буряад ТВ, Тивиком, Буряад ФМ буряад хэлэн дээрэ дамжуулгануудые гаргана. Мүнөө нэгэ шэнэ дамжуулга гараа. Тэрэ дамжуулгада ород угсаатанай үхибүүд буряадаар хөөрэлдэнэ. Ехэ һонирхолтой ха юм. Үхибүүд энэ дамжуулга хараад, буряад хэлэндэ дуратай болоно. Үшөө нэгэ шухала мүрысөөн – «Үндэһэн хэлэнэй үлзы хэшэг». Энээндэ олон үхибүүд хабаадана. Хэниинь илажа гарааб, мүнөөдэр эли болохо. Энэ тайзан дээрэ шангуудые барюулхабди.
Би ходо хэлэдэгби, гэртэхин буряад хэлэеэ өөрынгөө үхибүүдтэ, аша зээнэртэ дамжуулха ёһотой. Хэды дахин энээн тухай хөөрэлдэнэбди. Энэ ажал саашань ябуулха хэрэгтэй. Хэн буряад хэлэтэйб, өөрынгөө үхибүүдтэ, аша зээнэртэ тэрэнээ дамжуулха гэжэ найданаб.
Мүнөө зун Монгол Уласай Булган аймагта бүхы буряадуудай «Алтаргана» наадан үнгэрөө. Энэ нааданда хэдэн мянган буряадууд хабаадаа. Хари гүрэнһөө олон буряадууд ерээ. Манай Буряад Уласай түлөөлэгшэд олон мүрысөөнүүдтэ хабаадажа, шангуудые абаа. Манай буряад хэлэн, манай буряад соёл ямар баян, ямар һайхан гээшэб гэжэ хараабди.
Хүндэтэ нүхэд, хүндэтэ нютагаархид! Манай арад зондо хэрэгтэй энэ шухала ажал саашадаа амжалтатай ябаха гэжэ найданаб. Та бүгэдэндэ элүүр энхэ, ута наһатай, удаан жаргалтай, буян хэшэгтэй, амгалан тайбан ажаһуухыетнай хүсэнэб, - гэжэ Владимир Павлов тэмдэглээ.
