2018-2024 онуудта элүүрые хамгаалгын талаар гүрэнэй үндэһэн түсэл бэелүүлгын дүнгүүдые Буряад Уласай толгойлогшо Алексей Цыденов засагай газарай 2024 оной ажал тухай тоосоо хэхэ үедөө дүн гаргаа. Июниин 24-дэ болоһон Арадай Хуралай ээлжээтэ сесси дээрэ энэ тоосоото элидхэл хэһэн байна.
Тиигэжэ 2019 онһоо 2024 он болотор элүүрые хамгаалгын шэнэ 92 объектнүүд баригдаа, тэрэ тоодо 61 ФАП, 21 амбулатори, 8 поликлиника, элүүрые хамгаалгын 79 эмхи ехх мүнгэнэй заһабарилга хэгдээ.
2022 оной май һарада Буряадай уласай онкологиин диспансерэй 150 оронтой хирургиин шэнэ байшан ашаглалгада тушаагдаа. Энэл жэлэй октябрь hарада Ядерна анагааха ухаанай түб нээгдэжэ, Буряад Уласай, Эрхүү можын, Үбэр Байгалай хизаарай үбшэнтэнэй 6 мянга гаран шэнжэлгэнүүд ПЭТ/КТ аргаар хэгдээ. Хабдарта үбшэнтэй үбшэнтэнэй нэгэ жэлэй үхэлэй хэмжээн 26,7-һоо 19,1% болотор доошолоо.
Нёдондо жэл, 2024 ондо, элүүрые хамгаалгын 5 эмхи нээгдээ. Тэдэнэй тоодо 2 ФАП Мухар-Шэбэрэй аймагай Гаша тосхондо, Ахын аймагай Алаг-Шулуун һууринда, мүн Селенгинск болон Нарһата тосхононуудта хоёр поликлиника. Тиихэдэ «115 дугаар микрорайондо хотын 2-дохи поликлиника» поликлиникын филиал байрлуулха байшан абтажа, эмнэлгын 5 эмхи зургаануудта капитальна заһабари хэгдээ.
2024 ондо уласай элүүрые хамгаалгын эмхинүүдтэ 685 нэгэдэл эмнэлгын хэрэгсэлнүүд дамжуулагдаа – эдэ хадаа ультра-абяанай шэнжэлгын системэнүүд, компьютерна томографиин сканернууд, цифровой рентгенографиин хэрэгсэлнүүд, агааржуулгын аппарат, компьютерэй мэдээсэл суглуулха ба архивировалгын системэ (PACS системэ), эндоскопууд гэхэ мэтэ. 6 жэлэй туршада 3369 единица техникэ тушаагдаа. Эмнэлгын эмхинүүдэй автопаркда 2024 ондо 54 авто-унаа нэмэгдэжэ, 6 жэлэй туршада 448 шэнэ авто-унаа нэмэгдэһэн байна.
Байгша ондо, 2025 ондо, уласай элүүрые хамгаалгын түсэл үргэлжэлүүлэгдэхэ. Муйскын түб аймагай больницын поликлиникын барилга үргэлжэлүүлэгдэхэ, 9 ФАП болон амбулаторинууд баригдаха. Тиихэдэ аймагай поликлиникын 4 шэнэ байшан түргэн бодхоогдодог байгууламжануудай түхэлөөр бии болохо. Байгша ондо элүүрые хамгаалгын 4 эмхи зургаануудта бүхыдөө 117 сая түхэригтэ капитальна заһабарилга хэгдэхэ.
