Буряад Уласай Арадай Хуралда 2026 оной болон 2027-2028 онуудай түсэблэлгын хугасаада бюджедэй түсэл зүбшэн хэлсэгдэнэ. Буряад Уласай мүнгэн сангай сайд Георгий Мадаевай хэлэһээр, 2026 оной бюджет социальна шэглэлтэй байха. Гаргашанууд бүхыдөө 134,4 миллиард түхэриг болохо, тэрэнэй диилэнхи хубинь – 119,2 миллиард – гүрэнэй программануудта шэглүүлэгдэхэ гэжэ Восток-Телеинформ мэдээсэнэ.
Ерэхэ жэлдэ бюджедэй олзо оршо 126,5 миллиард түхэригтэ хүрэжэ, 7,9 миллиард түхэригэй дутагдалтай байха. Гэбэшье энэнь түсэлэй һүүлшын хубилалта бэшэ. Эдэ үдэрнүүд соо федеральна бюджедэй олзо баталагдаха ёһотой.
Субсиди бүхыдөө 36,7 миллиард түхэриг болохоор хүлеэгдэнэ. Энээнэй 24,4 миллиардиинь гүрэнэй һалбариин салинда, 3,3 миллиарднь бохир уһа сэбэрлэлгын байгууламжануудые барилгада, нуурай эрье бэхижүүлгэдэ болон бусад зорилгонуудта тэдхэмжэдэ шэглүүлэгдэхэ.
Буряад Уласай Арадай Хуралай Түрүүлэгшэ Владимир Павловай тэмдэглэһээр, уласай парламент октябриин 24-дэ уласай толгойлогшын дурадхаһан бюджедэй түсэл шалгаба, тэрэнэй агуулга Арадай Хуралай албан ёһоной сайт дээрэ оруулагданхай, танилсажа болоно бшуу.
