Июниин 24-дэ боложо байһан парламентын ээлжээтэ сесси тухай Арадай Хуралай Түрүүлэгшэ Владимир Павлов һанамжаяа хэлэбэ. Бүхыдөө энэ зүблөөндэ 47 асуудал зүбшэн хэлсэгдээ, тэдэнэй 37-ниинь хуулиин түсэлнүүд ба 10-иинь тогтоолнууд болоно.
Гурбан сагай туршада һунгамалнуудай зүбшэн хэлсэһэн гол асуудалнуудай нэгэн гэхэдэ, Буряад Уласай Засагай газарай 2024 оной ажал ябуулга тухай уласай толгойлогшын тоосоон болоно.Иимэ тоосоо хэлгэ болбол хуулиин дагуу заатагүй хэгдэхэ ёһотой. Арадай Хуралай һунгамалнуудай урда нютаг можын толгойлогшо жэл бүри иимэ тоосоо үзүүлдэг юм. Үнгэрһэн жэлдэ тоосоон 1 саг 40 минута тухай үргэлжэлһэн һаа, мүнөө жэл 2 саг тухай үргэлжэлөө, удаань һунгамалнууд асуудалнуудые табижа, үшөө нэгэ сагай туршада һанамжа дурадхалнуудаа оруулаа.
- Буряад Уласай толгойлогшын үзүүлһэн тоосоон ехэ удха агуулгатай байгаа, засагай газарай ажал ябуулгын бүхы һалбаринуудые, тэрэ тоодо демографиин бодолго болон гүрэнэй үндэһэн түсэлнүүдые бэелүүлгэ хамарһан байна. Засагай газар табигдаһан даабаринуудые урагшатайгаар дабажа байна, харуулалтанууд нормын хэмжээндэ байна. Ородой Холбоото Уласай бусад нютаг можонуудтай сасуулбал, Буряад Улас зарим тэды амжалтануудые харуулна. Тиихэдэ элидхэл соо 20 гаран региональна программануудта анхарал хандуулагдажа, тус бүринь дэлгэрэнгыгээр харагдажа үзэгдөө. Туйлаhан дүнгүүд hайшаалтай, үргэн хэмжээнэй ажал харуулна. Элүүрые хамгаалгын талаар хэлэбэл, эндэ үндэр харуулалтанууд бии, - гэжэ Павлов тэмдэглэбэ.
